相信成日入嚟西貢玩嘅朋友仔，對西貢市中心嘅交通應該都已經暸如指掌㗎喇！我地每一日接觸咁多玩獨木舟嘅客人，收到好多查詢到底點樣入嚟西貢搵我地係最快捷方便呢？所以希望呢個指南可以一次過解答你地！
1. 巴士
香港出行易：https://www.hkemobility.gov.hk/tc/route-search/pt
2. 小巴
小巴亦係一個來往西貢嘅不二之選，喺西貢市中心嘅小巴總站大致上有2個，一個位於西貢碼頭福民路，而另一個位於西貢惠民路，以下會簡單話比大家知邊條小巴線嘅上車位置，等大家唔洗頭擰擰搵餐死！
新界專綫小巴1、1A、 12：總站位於西貢碼頭福民路小巴總站
新界專綫小巴101M、紅色專線往銅鑼灣、觀塘：西貢惠民路小巴總站
紅色專線往旺角：西貢惠民路小巴總站 (星期六及假日17:00後班次改由西貢鄧肇堅運動場開出)
詳情可以參閱香港出行易：https://www.hkemobility.gov.hk/tc/route-search/pt
3. 自己揸車
如果有揸車嘅朋友仔入嚟西貢玩係方便嘅，不過假日嘅西貢未必咁容易搵到車位，可能需要預多小小時間搵位泊車。唔知大家知唔知道，其實運輸處早於2022年2月1日起，於福民路近西貢公眾碼頭的路段實施週末及公眾假期禁止非公共運輸車輛通行的交通管制措施，如非專利巴士、公共小巴及的士，禁止由福民路東行，或由惠民路左轉進入福民路由其與惠民路交界處以東的路段，如上圖紅色標示位置開始禁止駛入，受影響車輛可改由福民路與親民街交界處右轉前往親民街；或改由福民路與惠民路交界處左轉前往惠民路。
⛔️ 大家記得要留意呀，即刻收告票㗎!
運輸署交通通告詳情：https://www.td.gov.hk/tc/traffic_notices/index_id_65371.html
4. 的士
正如上圖所講，的士永遠都係無得輸，玩到攰一伸手就跳上車走，不過假日喺西貢就未必有呢支歌仔唱，有時人多的話，的士站條龍分分鐘長過以上公共交通工具！
所以大家玩都要識得睇時間走，以小編嘅經驗，交通最繁忙嘅時間應該係下午5點至7點，以玩獨木舟為例，5點前還艇，然後執嘢去沖涼，沖完涼就即刻離開的話，啱啱就撞正最多人搭車去嘅時候，除咗等車耐，塞車仲塞到阿媽都唔認得！所以小編建議大家如果唔趕時間的話，可以喺西貢食埋晚飯先走，周邊其實暗藏有好多充滿人情味又好食嘅餐廳小店㗎，食完飯啱啱好過哂繁忙時間，醫飽個肚，搭車走都舒服啲！
小編作為一個老西貢人，以一個喺西貢土生土長嘅角度，為大家真心介紹西貢作為一個「香港後花園」周邊鮮為人知嘅特色推介，包括食、玩、買等等嘅資訊，大家記得密切留意👀